تناقل ناشطون على مواقع التواصل الاجتماعي رسالة من أحد رجال المقاومة الاسلامية موجهة إلى الأمين العام لحزب الله السيد حسن نصرالله وجاء فيها:

-بتعرف يا سيد إنو على الجبهات في شباب متفرغة و متعاقدة ؟؟ و في شباب تعبئة عندها اشغال و مصالح تاركتها كرمال النهج والعقيدة؟؟ بتعرف إنو في دكاترة و مهندسين و اساتذة مدارس و طلاب جامعات و معلمين عمار و شغيلة فاعل على الجبهات لابسين نفس البذلة و عم ياكلوا من نفس الوجبة و كل همهم رضا ألله و رضاك؟؟

-بتعرف يا سيد انو في شباب فضّلت تقضي العيد بعيد عن عيالها بأراضي غريبة و بعيدة بس لأنك قلت (حيث يجب أن نكون سنكون)؟؟؟

-بتعرف يا سيد إنو يوم القدس و بسبب ضعف الإرسال الخاص بالراديو في شباب طلعت على السطوح و خالفت التكليف بعدم التواجد بأماكن مكشوفة و عرضوا حالهم للخطر بس كرمال يسمعوا صوتك؟؟ بتعرف مجرد سماع صوتك شو صار فيهم؟؟

-بتعرف يا سيد تاني يوم العيد لما بعتت وفد من القيادة كرمال يعيّد الشباب و يسلم عليهم واحد واحد و طلبت منهم الدعاء ....إنهم بكيوا!!؟؟؟
مش سهلة ينقال للأخ :
سماحة السيد بيعيدك و بيقلك ألله يتقبل أعمالك و يسألك الدعاء.

-بتعرف يا سيد إنو الهدية يللي بعتتها لكل أخ من الإخوان -(علبة فيها لوز/جوز/تمر/زبيب/مشمش مجفف)- و على بساطتها ، بس كانت أغلى من قطعة أرض ، و في إخوان ما أكلتها و ضبتها بالشنط كرمال ياخذوها تبارك بيوتهم اذا ألله كتبلهم العودة؟؟؟

-بتعرف يا سيد إنو معظم الكلام بالسهرات بين الإخوان بيكون عنك ؟؟ أقسم بالله إنو الشباب حافظين كلامك و حركاتك و نوادرك.

-بتعرف يا سيد إنو في شباب تشرّفت بيوم من الأيام بلقائك و بيتغنّوا بهالموضوع و بيتفاخروا على بعضهم البعض؟؟ و في شباب بقلبها حسرة إنو ما إنكتبلها شوفتك بشكل شخصي؟؟

-بتعرف يا سيد إنو في إخوان بتهدد بعضها بإسمك؟؟ و خصوصي بالأشياء المسلكية ؟؟ بعبارة :
هيدا مش تصرف ولد من اولاد السيد حسن ، السيد حسن إذا عرف ما رح يكون مبسوط منك؟؟
يا سيد كلنا اولادك و كلنا منحترمك و منخاف على زعلك.

-سيد حسن ، عندك شباب رهن إشارة منك ، مش لأنك الأمين العام ، لأنك أبونا .....كلنا هادي يا ابو هادي ، كلنا هادي...