كشف الإعلامي الساخر باسم يوسف أنه أصبح فيجن أو خضريا، أي أنه أصبح نباتيا لا يأكل اللحوم ومنتجاتها من الألبان والبيض، مؤكدًا أنه تحول لهذا النظام لأسباب صحية بحتة.
وكتب باسم يوسف تدوينة على فيس بوك "بمناسبة الألعاب الأوليمبية، وهنا مش حتكلم عن مين رفع علم إيه لأن الناس قامت بالواجب. المهم أنا عايز أتكلم في موضوع بعيد عن السياسة وبيمسني أنا شخصيا. أنا داخل على تلات سنين باتبع النظام النباتي. وخليني أكون دقيق وأقول إن أنا مش نباتي بمعني (vegeterian) ولكني خضري أو "vegan" وده معناه أني مش باستهلك أي نوع من أنواع منتجات الحيوانات بما فيها الألبان والبيض. بعكس الفيجتريان اللي بياكلهم. وخليني دقيق أكتر وأقول إني باتبع نظام أكثر انضباطا وهو plant based whole food diet والفرق هنا اني مش باستهلك أي شئ مصنع بما فيهم السكر والزيوت ومش باكل الأكل المقلي"..

وقال "فيه vegans كتير مع التزامهم بعدم استهلاك منتجات حيوانية إلا أنهم بيستهلكوا كميات كبيرة من الأكل المصنع والسكر والأكل المقلي في الزيوت وده مش صحي".

وأضاف "فيه نقطة مهمة في النقاش نحون الأكل النباتي (أو الخضري تحديدا) هي إزاي ناخد كفايتنا من البروتين أو الكالسيوم. البوست المرفق بيتكلم عن بطل رفع اثقال أمريكي مشارك في الألعاب الأوليمبية وهو فيجان تماما. فيه أمثلة لرياضيين تانيين ومتبنيين نفس أسلوب الحياة. وفي الأيام اللي جاية حالقي الضوء عليهم"..

وتابع "فيه أسباب كتيرة أن الواحد يقلب نباتي أو خضري أهمها تحديدا السبب الأخلاقي وعدم أذية أو قتل الحيوانات. ومع احترامي الشديد للسبب ده لكن مش هو ده السبب اللي عشانه حولت للنظام النباتي. أنا حولت للنظام ده لأسباب صحية بحتة وفعلا صحتي اتحسنت كتير جدا وساعدت ناس كتيرة بأمراض مزمنة أنهم يحسنوا صحتهم. الكلام ده شرحه يطول".

وقال "أنا باتمنى أن في يوم من الأيام أعمل عمل إعلامي يوضح المواضيع دي ويشرحها بالتفصيل لأن فيه ناس استفادت من ده جدا وأتمنى أن الفايدة تعم أكتر. مرة تانية بوست واحد مش كفاية عن الموضوع ده وعشان كده من وقت للتاني ححط أفكاري هنا على الموضوع ده. أتمنى تستمتعوا بمتابعة الألعاب الأوليمبية وتستمتعوا بصحة أفضل"..